ABALU MORE

Tetoomo ri tempo ipiamo ako’ to lino pai ngaya-ngaya ngkatuwu au re’e ri Lembantana sape wingke ndano katuwunya madago pai pombesabe lau pombetubunaka samba’a pai samba’a . Ri Wawo buyu Suolemba pontu posuondano tuwumo samba’a tau bangke pai malangkati ane malulu imba tau tu’a owi alima rata aono ndopo (imba sandopo tau tu’a owi ungkari potoga mpale samba’a rata potoga mpale ncambira bara ane wawase’i 1Depa = 1.7m) tau se’i au mampoto’o I Roka Tabalu More’ ndalanti wa’a ntau nceemo Muli Tualemba Ri watu ngkaade-ade au mampatuwu Garanggo mawa pai bengga/baula lampu.

 

Wali katuwunya Tabalu More se’i mogalo pai wa’a ntau au re’e ri Lembantana sape Wingke ndano rata ri tasi randaue. Bare’emo lengko ngkoro au be singkana pau pai raya ntau ua kadagondaya I Tabalu More ane rapanya re’e pari bara rugi au merampe ri samba’a lipu bara Susandaya ri Lembantana Ewa karampe Ju’a bara Susa ri Jamaa bare’emo ntaninya au damamporewu bara damamporiyokoi Katuwu ntau sindara setu inceemo I Tabalu More. Tabalu More mangkekeni samba’a pekekeni nceemo peaya ndaya ri Pue Ara nTolindo, banya Pue mPalaburu bara Pue Ndisongi. Manyomba ri Pue Ara nTolindo au mangawai karoso ngkoro pai pangancani baraka mewali ngaya-ngaya au bisa mampakagero wawo ntana, yangi pai ue pai maatori pogumbali lino se’e nceemo au ndasomba I Roka Tabalu More. Bareemo tempo setu au mantuju peruu bara damoiwali ungkari wawolemba samba’a pai lemba ntaninya.

 

Tetoomo re’e se’e Katuwu wa’a ntau ri ra’mbana buyu ToRau sape Lemba Lore au ngkare’enya sae ri wawo baba ncalukaia , mewali samba’a tadulakonya mampoto’o Taroku Lemba ‘ au mampotumpu Tawala bara Tanggerahi au baraka ane sangkani ndayou njaa au risuara bara rampe kono mata’a sangaya-ngaya datepujaa moberese sambawo ntana. Lengko ngkoro I Taroku Lemba se’e bare’emo singkana pai wa’a ntau au re’e ri tesantila Lembantana pagonya au ri wawo Lore, maka pada au mewali ri lemba lore sae nceemo ua pampowia I Taruku Lemba ane re’e lipu au besingkono raya pai ponawa-nawa Taruku Lemba liu ndawutumo Tanggerahi au damampakagero lipu setu radua pai togo ngkani pogundu ri wawo ntana pai yopo lene mewali Pada… (nceemo sae painaka Lemba lore maria pada) .

 

Tetoomo se’e ungkari Pau Ntu’a owi Taruku Lemba pai wa’a mpalilinya mampoto’o Tibura Tamungku Puna (ndatolele se’e wa’a Ntu’a pokoro-koronya bangke pai malangkati) . Ane mo iwali banya mampake nyara paikanya melamba ri baula bangke ane nyara podo ndapake maulaya baeli ngkoro da poiwali.

 

Ua mewalimo poraoa au bemolese ri santila wawo Lembantana re’emo au teare-are ungka lemba lore pai santila lipu Wingke ndano ratamo tau jela ri Suolemba tampa ngkaree Roka Tabalu More damampetumbu njaamo au mewali. Ungka lairia mesuwumo Tabalu More ungkari Bolombatu au re’e ri Suolemba Posuo ndano(wawasei Suombuko) , ndapasowamo pura-pura njaa tangarandaya wa’a ntau au jela setu. Ua buke purundaya Tabalu More madonge kasusandaya au rampe ri Wawo Lembantana pai santila Wingke ndano, mompaumo rii oyo ntau sondo Tabalu More ‘ane darayami mewali Madago muni poraoa Lembantana se’e ndapakaroso rayami mekakai manyomba ri Pue Ara nTolindo pai ada mpanyomba au singkana. Ungka lairia mepokumo Tabalu More mampeboo wa’a mpinatuwunya Garanggo mawa pai Bengga lampu au damantima Ta Uduncii Marari ri Tando bancea pai Ngkai Wurisanga ri Tando Tangkadao.

 

Jabutu tepasambaka Tabalu More, Ta Uduncii Marari pai Ngkai Wurisanga mampowia ada mpanyomba ri Pue Ara nTolindo danaka waremo powia Taruku Lemba pai Tibura Tamungku Puna au mampakagero sambawo ntana. Sindara setu mena’umo Taruku Lemba pai Tibura Tamungku Puna ratamo ri Lemba Lambara Ngoyu pai wawo Buyu ToRau. Mesonomo Tabalu More ri Ta Uduncii Marari pemponemo ri wawo buyu koro Oga ane ratamo lelimo wana se’e pai pangancanimu danaka ane moiwali yaku pai Taruku Lemba Yopo ri Pangale bemewali pada ua ngkamanimpu Tanggerahi I Taruku Lemba, ane Ngkai Wurisanga siramo damasuaraki Tibura Tamungku Puna au mena’u ri buyu ToRau.

 

Poiwali setu ndatepuu ri reme kaisa rata reme katatogo ua ro ndapetondoni ri pompatuju Pue Ara nTolindo dakapanangi I Taruku Lemba se’e ane Tawala’a Tanggerahi bemanimpu ri wana au ndaleli pai pangancani Ta Uduncii Marari Paikanya Tabalu More se’e au makekeni pura-pura pangancani Taruku Lemba danaka bemewali pogumbali wawo lino se’e. Tatogo mpuyu Tau manimpu kabose ri Tibura Tamungku Puna pura ndaalesi Ngkai Wurisanga ri wawo ntana buyu nToRau . Eo kapanangi Taruku lemba setu se’e eo ndapasingkonti Mampoto’o buyu setu nceemo Buyu Tangka bulonci’ ua Tanggerahi Taruku Lemba ndatangka I Tabalu More mewali mancii bare’emo poberesenya ri wawontana.

 

Taruku Lemba mate watangkoro mewali watu au re’e ri wana buyu Tangkabulonci, wa’a ntau anu mate ri buyu nToRau ndadika ri kumapa roncee ndataunaka ri Bolombatu au re’e ri Buyu nToRau. Kamate Taruku Lemba pai wa’a ngkabose Tibura Tamungku Puna mampakarodo raya wa’a ntau ri Lembantana pai Wingke ndano.
Ta Uduncii Marari mewalili ri Tana Tando Bancea, Ngkai Wurisanga mewalili ri Tando Tangkadao, pai tetoomo pau Ntu’a katuwunya Tabalu More buke pai dago wawontana. Tabalu More pai mulinya tuwu ri Lemba sape Wingke ndano pai Karodo ngkare’enya nceemo ri Suolemba au re’e Bolombatu sowa rata tana Tambarana.. Ndatolele wa’a tau tu’a owi kumapa Tabalu More re’e ri Bolombatu oyo Koburo sincanga pai Suombuko nceemo kono wawasei ‘Siuri’ lau takumboo pai wuku au ndarata wa’a ntau tu’a bare’e kasiwia ewa wuku ntolino wawasei. Lau toga pai gongga bangke au re’e ri kumapa pai ndawaya mpegulilingi pai waya koloro kayoro kambuka bangke au njau ri Siuri.

 

(Sekilas mengingat sebagian kisah orang tua yg pernah hidup pada zaman dulu dan menjadi legenda yg dilupakan banyak orang. Ini hanya mengingatkan bahwa ada kehidupan nenek moyang dari Tanah Poso yang hanya diketahui oleh segelintir orang, dan adalah asli penuturan dr tradisi turun temurun bukan kisah menurut cara pandang pribadi dan campuran orang luar yg mengaburkan nilai luhur peninggalan nenek moyang itu sendiri. Kisah Tabalu More ada beberapa yg sangat bagus untuk menjadi pelajaran tentang tradisi tanah Poso yg sudah banyak memudar di generasi sekarang. Kisah ini hanyalah sebagian dari perjalanan hidup Tabalu More, yg mungkin sebagian dari kita hanyalah cukup menjadi Dongeng seblum Tidur tetapi sebagian dari penerus tradisi budaya penutur di tanah Poso, kisah hidup seperti ini akan terus hidup dan dihidupi..)

 

‘TABALU MORE ‘Manusia raksasa Danau Poso… ‘.

Facebook Comments